सुतला मे, जगला में, चेत में, अचेत में।
बारी, फुलवारी में, चँवर, कुरखेत में।
घूमे जाला कतहीं लवटि आवे सँझिया,
चोरवा के मन बसे ककड़ी के खेत में।
- संगीत सुभाष
आपन जिद्द ना छोड़ब रउरा,
सबका से मुँह मोड़ब रउरा,
हम रउरा से जुड़ल चहनी,
हमसे नाता तूड़ब रउरा ?
- संतोष विश्वकर्मा सूर्य के ह्वाट्सअप से
———–
रउरा केहू का बोलावा पर ओकरा जमघट में चहुँपी आ देखीं कि मेजबान सभका से त मिलत-जुलत बा, स्वागत करत बा बाकिर रउरा से कुछऊ नइखे बोलत त रउरा कइसन लागी ?
ऊपर से अगर इहो कहिे देव कि जानत बानी जेतना लोग आइल बा, ओहमें से कई लोग लवटि जाई आ दुबारे ना आई, त का ई रउरा खातिर कवनो संकेत बा ?
दोस्त अपना माशूका के बिआह से लवटल त पूछनी कि कइसन लागल अपना माशूका के दुलहा के गुलदस्ता थमा के ?
———–
कहलसि कि बूझाइल जइसे चुनाव में अपना विरोधी के वोट डाले के पड़ गइल होखे.
———————
हे भगवान, अबकी वर्ल्डकप 2023 में INDIA के जीतवा दऽ. बदला में भलही 2024 को चुनाव में I.N.D.I.A. के हरवा दीहऽ.
———————
महतारी साले-साल कलेण्डर छापत रही आ बेटा के कहना बा कि केहू एडुकेटे ना कइले रहल उनुका के.
———————
दुख के लोरे से दहवा के सहि जाले ई।
सुख में बदरी के जल बनि के बहि जाले ई।
मुँह त लबजा हवे जाने कब का कही?
आँखि लबजी ना ह साँच कहि जाले ई।
———————
हम एकसँसिए दउरत बानीं,
तहरो तऽ कुछ करे पड़ी।
हमरे जइसन तहरो बाबू!
धधकत अगिनी जरे पड़ी।
दाल-भात के कवर हवे ना,
रिन्हल राखल, चट खा लऽ,
जिनिगी हउए कठिन लड़ाई,
जिए का पहिले मरे पड़ी।
———————
कवन रूप अँखियन में राखीं, कवन रूप बिसराईं हम?
लउकत बा ऊ सचहूँ बाटे, कवन भाँति पतिआईं हम?
अदिमी का चेहरा पर चेहरा, चेहरा पर फिनु चेहरा बा;
सभे देखि ले चेहरा अतना दरपन कहवाँ पाईं हम?
———————
तहरे नाँवे पल-पल जिनिगी, तू मानऽ, भा मति मानऽ।
भावसुमन सब तहरे माँथे, तू भलहीं लाते खानऽ।
कबिताई के दीप जराईं तहरा बदे अन्हरिया में;
हमरा मन में बस तू ही तू,अपना मन के तू जानऽ।
– ऊपर क चारो चुटपुटिहा सुभाष पांडेय का व्हाट्सएप से
———————
ऊँच-नीच ना सोचे गुनिजन आगे माथ झुका देला।
अच्छरि-अच्छरि, शब्द- शब्द के रोजे पाठ पढ़ा देला।
अधरे हँसी, काने रूई भरि, जीभि लगाम लगावे जे,
बड़े-बड़े वक्ता-वीरन के, छन में धूरि चटा देला।
– सुभाष पांडेय का व्हाट्सएप से
——————-
अपने मूड़ी, अपने डंडा, अपने हाथ पिटाई बा।
अपने रस्ता रोके, खोले, उतरे – चढ़े चढ़ाई बा।
अपने जोरे, अपने छोड़े, अनके नाम बतावेला;
मन का भीतर झँकनीं, पवनीं, खुद से सजी लड़ाई बा।
– सुभाष पांडेय का व्हाट्सएप से
——————-
फूल डाली से टूटल बेजान हो गइल,
भागि जेकरे से रूठल हेवान हो गइल;
लाख जोरीं, सटाईं, मिलाईं मगर,
दिल जो टूटल त टुटते जियान हो गइल।
– सुभाष पाण्डेय के व्हाट्सएप से
——————————
भोला बाबू का पीछे एगो पिल्ला लागल रहुवे.
भोला बाबू चिचियात भागल जात रहलन कि हम त जियो सिम डलववले बानी. ई ससुरा वोडाफोन के नेटवर्क कइसे ध लिहलसि.
—————————–
- ओकरा ला तू शराब छोड़ दीहलऽ, सगरी नशा छोड़ दीहलऽ. बाकिर बुझाइल ना कि ओकरा से बिआह काहे ना कइलऽ ?
-
अरे यार, का बताईं. ओकरो ले नीमन नू भेंटा गइल !
———————————
मरीज के जाँच कइला का बाद डाक्टर बतवलनि कि –
तोहार बेमारी पुरान ह आ गँवे गँवे तोहरा के खात बिया.
ई सुन के मरीज फुसफुसाइल – डाक्टर साहब तनी धीरे बोलीं. बाहरे बइठल बाड़ी.
लड़िका – बुझाता कि हमनी के बिआह ना हो पाई.
लड़िकी – काहे ? बाबूजी का कहुंई ?
लड़िका – तोहरा बाबूजी से त भेंटे ना भउवे. तोहरा घरे गँउई त तोहरा बहिन से भेंट हो गउवे. आ गजब के धांसू बिया तोहर बहिनिया ! सोचतानी कि ओकरे से बिआह क लीं.
—————————————-
सावित्री जमाना पहिलहीं अपना पति सत्यवान के यमराजो का हाथ से छीन ले आइल रही साबित कर गइल रही कि अगर मेहरारू ठान लेव त यमराजो ओकरा मरद के बचा ना सकसु.
—————————————–
शादी का सालगिरह पर एक जने अपना मेहरारू के हीरा के हार दिहलें.
मेहरारू ओकरा बाद उनुका से छह महीना ले ना बतियवलसि.
काहें ?
….
…
…
इहे तय भइल रहुवे.
————————————–
अंजोरिया पर प्रकाशित होखत चुटपुटिहा लोग के बहुते पसन्द आवत रहुवे बाकिर भोजपुरिका पर चुटपुटिहा छूट गइल रहुवे. अब एकरा के एहिजो शुरु कइल जात बा.