मथैला मजबूरी में दिहले बानी. कई बेर बुझाव ना कि भोजपुरी के ई दुर्दशा कवना चलते भइल बा. बीस बरीस से बेसी हो गइल भोजपुरी में एह पहिलका वेबसाइट अँजोरिया के चलावत. आ एह दौरान के अनुभव से हम त इहे कहब कि भोजपुरी के दुर्दशा कुछ धनपशुअन का, आ बाकी उनुका धन का सहारा से चलत लठैतन के. आ जवन बाकी कुछ बाचल-खुसल रहि गइल तवना के भोजपुरी के तथाकथित सेवक लोग के कृपा से.

आजु ले ई ना सोच पवनी कि भोजपुरी के संस्था चलावे वाला लोग के काहे लाज भा असकत लागेला अपना संस्था के गतिविधियन के जानकारी भोजपुरी में देबे में. आराम से हिन्दी में लिखल विज्ञप्ति लोग पठा देबेला आ हमरा ओकरा के भोजपुरी में उल्था करे पड़ेला. कई बेर टोक चुकनी, कई बेर एही चलते महटिया दिहनी बाकिर जब ऊ लोग आपन आदत सुधारे ला तइयार नइखे त हम काहे आपन बिगाड़ीं. आ बात कवनो एगो संस्था ले के नइखीं कहत. सगरी संस्थन के इहे आदत बा. गलतिए से कभी कवनो समाचार भा विज्ञप्ति भोजपुरी में लिखल मिलेला.

मानत बानी कि ओह लोग के आपन समाचार हिन्दी भा अंगरेजी अखबारन में छपवावे के होला से ऊ लोग आपन विज्ञप्ति हिन्दी भा अंगरेजी में लिख भेजेला. बाकिर ओह लोग के सचहूं भोजपुरी से नेह छोह रहीत त ऊ लोग आपन मूल विज्ञप्ति भोजपुरी में लिखीत आ ओकरा साथे हिन्दी अंगरेजी अनुवाद नत्थी कर दीत.

शायद ओह लोग के नजर में कवनो भोजपुरी मीडिया अइबे ना करे. या त लोग अँजोरिया का बारे में जाने ना, भा देखावे-जतावे के कोशिश करेला कि ऊ लोग भोजपुरी के अतना बड़ हित-चिन्तक ह लोग कि उनुका सोझा अँजोरिया के का बिसात.

जानत बानी कि बहुते लोग के हमार ई बात जहर लेखा कचोटी. बाकिर एकरा ला हम माफी नइखीं माँगे वाला कि हमरा बात से ओह लोग के दिल दुखा गइल. असल में हमार मकसदे ई बा कि ओह लोग के बाउर लागे आ आगा से या त हमरा के भोजपुरी में विज्ञप्ति भेजे लागे भा भेजले बन्द कर देव. दुनु हालत में हमरा पर ओकर कवनो असर नइखे पड़े वाला.