चढ़ जा बेटा सूली पर भला करेंगे …

महाराष्ट्र विधानसभा चुनाव के परिणाम 23 नवम्बर का दिने आ गइल बाकिर आजु आठ दिन बीतला का बादो तय नइखे हो पावल कि मुख्यमंत्री केकरा के बनाई भाजपा. भाजपा खातिर ई कवनो अजूबा नइखे काहें कि पता ना चले कि ओकरा मन में का बा आ ऊ करे जा रहल बिया.

पहिले के सरकार में हर खबर पहिलहीं निकल के आ जात रहुवे आ पत्रकारो लोग आपन-आपन भविष्यवाणी बतावे में पीछे ना रहत रहुवे. बाकिर मोदी-शाह वाली एह भाजपा के कवनो खबर लीक ना हो पावे आ फैसला होईए गइला का बाद लोग के पता चलेला कि का फैसला भइल.

अगर रउरा सोचत होखब कि भाजपा में अरामी नइखन त एह गलतफहमी के जतना जल्दी हो सके अपना दिमाग से निकाल दीं. भाजपा में अरामियन के कवनो कमी नईखे. बाकी गोलन में त थोड़ेबहुत रामी मिलिहें बाकिर भाजपा में अरामियन के गिनितो ढेरे होला. आ जवन नेता भाजपा भा संघ के पृष्ठभूमि से ना आवसु ऊ लोग एह अरामियन के शिकार सहजे हो जाला.

ईयाद करीं साल 2014 के लोकसभा चुनाव. भाजपा में बहुते लोग अइसन रहल जे ना चाहत रहुवे कि नरेन्द्र मोदी के प्रधानमंत्री के उमीदवार बनावल जाव. एह लोग के लागल कि अगर एनडीए में कवनो बखेड़ा खड़ा करा दीहल जाव त शायद मोदी के आइल रुक जाई. अइसने लोग बिहार के मुख्यमंत्री रहल नीतीश कुमार के चना के झाड़ पर चढ़ा दीहल आ ऊ चढ़ गइलन. कहलन कि उनुका मोदी मंजूर नइखन एहसे ऊ एनडीए का साथे ना रहि सकसु. बाकिर भइल उहे जवन होखे के रहल. मोदी आइए गइलन एह अरामियन का छाती पर मूँग दरे. अलग बाति बा कि तब बिहार के राजनीतिक समीकरण कुछ अइसन रहल कि पलटी मरला का बावजूद नीतीश कुमार मुख्यमंत्री बनल रहि गइलन आ राजद के एगो नया जिनिगी मिल गइल. अगर ओह घरी भाजपा के अरामी नीतीश के चढ़वले ना रहतन त नीतीश के बार बार पलटी मारे के जरुरत ना होखीत.

आजुकाल्हु अइसने कुछ हो रहल बा महाराष्ट्र में. भाजपा के कुछ अरामी एकनाथ शिन्दे के चना के झाड़ पर चढ़ा दिहले बाड़न आ एकनाथो भोलानाथ बन गइल बाड़न. बिहार में नीतीश कुमार जइसे जब-तब अपना कोप-भवन में चल जालें ओही तरह के एगो कोप-भवन एकोनाथ के बा. बतावल जात बा कि ऊ जब कुछ बड़का करे वाला होलन त चिंतन मनन करे अपना गाँवे चलि जालें. आ ओह गाँव के खूबी भा खासियत कहीं कि शिन्दे के मुख्यमंत्री रहला का बावजूद ओहिजा मोबाइल के नेटवर्क ना मिले. इहे बतावत बा कि शिन्दे कतना आगे के सोच के चलेलें.

देवेन्द्र फणनवीस मुख्यमंत्री ना बनसु एकरा ला जतना जोड़-तोड़ कबो महाविकास अघाडियो ना कर पावे ओह ले बेसी जोड़-तोड़ भाजपा के अरामी कर लेत बाड़न. ई आलेख लिखत घरी ले मालूम नइखे कि आखिर में केकरा के मुख्यमंत्री बनावल जाई. यूपी, मध्यप्रदेश, राजस्थान, हरियाणा, छतीसगढ़ जइसन उदाहरण भरल बा जब आखिरी बेरा ले लोग के पता ना चलल कि केकरा माथे ताज चढ़ावल जाई. कहे वाला त इहो कहेलें कि यूपी में योगी उपयोगी कम ओह लोग ला मजबूती अधिका बाड़ें. योगी के बरदाश्तो करे में एह अरामियन के दिक्कत बा आ उनुका के हटावलो मुश्किल बा. कुछ अइसने हाल फणनवीसो के बा. एह अरामियन के ना चहला का बावजूद उनुके कपारे चन्दन लागे के उमेद कइल जा रहल बा. काहें कि बतावल जात बा कि संघो का तरफ से साफ बता दीहल गइल बा कि महाराष्ट्र में फणनवीसे के मुख्यमंत्री बनावल जाव. बाकिर भाजपा के कुछ अरामी अपना के संघो से बेसी बेंवतगर मानेलेंं.

अतना लिख मरला का बावजूद हमहूं निश्चित नइखीं कि महाराष्ट्र के ऊंट कवना करवट बइठी. बाकिर हर हाल में नुकसान एकनाथ शिन्दे के छवि के हो के रही. चना के झाड़ पर चढ़े वालन के नियती कुछ अइसने होला.