(बुध, 9 नवंबर)
- लखनऊ के दू गो मुख्य चिकित्सा अधिकारियन के हत्या के मामिला के जाँच करे वाला सीबीआई टीम के आजु बुध का दिने अदालत से दू महीना के अउरी समय दे दिहल गइल.
- मऊ के स्वतंत्रता सेनानी, चन्द्रभान गुप्त के मंत्री मण्डल में मंत्री रहल, विधायक रहल रामविलास पाण्डेय के आजु पंचानबे साल का उमिर में निधन हो गइल. उनुकर अंतिम संस्कार काल्हु दोहरी घाट पर कइल जाई.
- फैजाबाद के इनायतनगर इलाका में एगो सड़क दुर्घटना में आचार्य नरेन्द्रदेव कृषि विश्वविद्यालय के वैज्ञानिक डा॰ पीएन सिंह आ बिहार कृषि विश्वविद्यालय के अमरनाथ प्रसाद के मृत्यु हो गइल आ चार गो शोध छात्र घवाहिल हो गइले.
- भाजपा के स्वाभिमान यात्रा के दुसरका चरण में आजु बहराइच से राजनाथ सिंह आ हमीर पुर से कलराज मिश्र आपन आपन यात्रा शुरु कइलन. एह चरण के समापन सत्रह नवम्बर के अयोध्या में होई.
- बलिया के ददरी मेला आजु से शुरु हो गइल. कातिक नहान खातिर भारी भीड़ बलिया पहुँचल शुरु हो गइल बा. एह साल ददरी के मेला अपना पारंपरिक जगहा से हट के लागल बा काहे कि मेला क्षेत्र के जमीन पर लोग मकान बना लिहले बा.
- उत्तर प्रदेश के विपक्षी दलन के आरोप बा कि मायावती सरकार के सबले भठियारा बतावे वाला वरिष्ठ पुलिस अधिकारी डी.डी. मिश्रा के नजरबंद कर दिहल गइल बा.
- अलीगढ़ में पुलिस बुध का दिने एगो अवैध हथियार फैक्ट्री के भंडाफोड़ करत तीन गो अपराधियन के 40 गो तमंचा का साथे गिरफ्तार कर लिहलसि.
0 Comments