करे केहू भरे केहू

पिछला दिने अमेरिका के न्याय विभाग आ प्रतिभूति बाजार विनियामक SEC (जइसे भारत में SEBI बा) का तरफ से आरोप लगावल गइल बा कि भारत के एगो विख्यात उद्योगपति अडानी के एगो कंपनी अडानी ग्रीन कंपनी के निदेशक अपना बाजार के बढ़ावे ला करीब अढ़ाई हजार करोड़ रुपिया बतौर घूस दिहलन जेहसे उनुका कंपनी के भारत के कई राज्यन में आपन काम बढ़ावे के मौका मिलल गइल गलत तरीका अख्तियार करके.

आजु अडानी समूह एह आरोप के निराधार बतावत खंडन क दिहलसि आ कहलसि कि अडानी समूह अपना काम में शुचिता आ पारदर्शिता के पूरा पालन करेला आ एह तरह के आरोपन के गलत साबित करावे ला ऊ हर तरह के कानूनी तरीका अजमइहें.

बाकिर अपना देश का विरोधी गोलन खातिर त ई बाति बिलाई का भागे सिकहर टूटला जइसन हो गइल. काल्हु भइल चुनावन में मिले जा रहल अनुमानित हार पर से लोग के धेयान हटावे के एगो बढ़िया मौका मिल गइल.

माई बेटा के एगो पुरान फोटो

कांग्रेस के अध्यक्ष रहल बाकिर तबो आ अबहियों ओकर सर्वेसर्वा आ लोकसभा में विपक्ष के नेता राहुल गांधी आजु प्रेस कांफ्रेंस क के आरोप लगवलन कि अडानी के चूंकि प्रधानमंत्री नरेंद्र मोदी से सांठगांठ बा एहइ चलते अडानी का खिलाफ कार्रवाई नइखे होखत. पचास बरीस पार कर चुकल एह युवा नेता के कानूनी जानकारी गजबे के बा. आरोप लगते गिरफ्तारी हो जाए के बात कहे वाला ई नेता अपनहीं भ्रष्टाचार के एगो मामिला में जमानत पर बाहर बा. अपनहीं ना इनकर महतारिओ जमानते पर बाड़ी बाकिर अडानी के जांच से पहिले, कोर्ट से फैसला आवे से पहिलहीं गिरफ्तार कर लेबे के चाहीं.

राहुल के शायद याद करावे के पड़ी उनुका नागरिकतो पर सवाल उठावल जाला. कहल जाला कि ऊ भारत के नागरिक होखे लायक नइखन काहे कि उनुका लगे इटली आ ब्रिटेन के नागरिकता बा. त का एह आरोप का चलते उनुका के लोकसभा से निकाल बाहर कर के जेल में डाल देबे के चाहीं. हो सकेला कि प्रधानमंत्री नरेन्द्र मोदी आ अमित शाह से राहुलो के कवनो सांठगांठ बा जवना चलते एक जमाना से एह मामिला में कवनो कार्रवाई नइखे होखत.

सब छंवड़ी झूमर पारे त लंगड़ी कहे हमहूं. भ्रष्टाचार के कई गो मामिलन में शामिल नाम कश्मीर के मुख्यमंत्री रहल फारुख अब्दुल्लो के मांग बा कि जब अमेरिकी अभियोजन एजेंसी अडानी का खिलाफ आरोप पत्र जारी क दिहले बिया तबो भारत में अडानी पर कवनो कार्रवाई काहे नइखे होखत. इनकरो कहना बा कि अडानी के तुरते गिरफ्तार क के कार्रवाइ होखे के चाहीं.

अडानी समूह से जुड़ल एह खबर के अइला का बाद देश के निवेशक के कई लाख करोड़ रुपिया के नुकसान हो गइल. सेंसेक्स 423 अंक गिरके आ निफ्टी 168.60 अंक गिर के आजु के बाजार बंद भइली सँ. अडानी समूह के कंपनियन के जवन पिटाई भइल तवने एह नुकसान के जिम्मेवार बा. आगा चलिके अगर आरोप बेबुनियाद साबित भइल त का एह नुकसान खातिर अइसने बड़बोलवन के जिम्मेदार ठहरावे के चाहीं.

वइसे पता ना ई ट्रेन देर से काहे आइल. चुनाव त बीत गइल आ लोकसभा के सत्र शुरु होखे में कुछ दिन बाकी बा. अकसरहां भारत के विरोधी ताकत अपना पिट्ठुवन का मार्फत अइसने बवाल रहि रहि के खड़ा करत रहेली सँ. देशवासियन के सचेत रहला के जरुरत बा.