अँजोरिया के संस्थापक संपादक डॉ राजेन्द्र भारती

काल्हु अचानके देखनी कि हमरा ह्वाट्सअप पर एगो नया सनेसा आइल बा. नंबर अनजान रहुवे बाकिर चेहरा सुपरिचित. अंजोरिया के संस्थापक संपादक डॉ राजेन्द्र भारती के. तुरते फोन लगवनी बिना सोचले कि अब रात हो चलल बा. कुछ देर ले घंटी बाजल त सोचनी कि सूत गइल होखब से दुबारा फोन ना लगवनी. बाकिर कुछे देर में ओने से फोन आ गइल. हम हलो हलो करत रह गइनी ना त हमार आवाज उनुका ले चहुँपत रहल ना उनुकर आवाज हमरा ले. मोबाइल सेवा प्रदाता जतना डींग हाँक लेसु बाकिर सभकर नेटवर्क कमोबेस एके जइसन होखेला. केहू के कवनो टावर से त केहू के कवनो टावर से संपर्क निकहा हो जाई बाकिर हर टावर से आ हर समय संपर्क सहिये हो जाव एकरा ना होखे के गारंटी बा. एही चलते जब हम प्रोफेशन में सक्रिय रहीं तब ले चारो कंपनियन के कनेक्शन राखत रहीं. अब त बस दूइए गो रह गइल बा – जियो आ एयरटेल के. आ दुनू के हालात अइसने बा कि के बड़ छोट कहत अपराधू !

से सनेसा लिख दिहनी कि नेटवर्क का चलते बात नइखे हो पावत से काल्हु सबेरे फोन करब. बाकिर मन बेचैन रहुवे काहे कि एक जमाना बाद भारती जी के नंबर मिलल रहल. आजु सबेरे जइसहीं नेटवर्क सही मिलल हम फोन लगा दिहनी भारती जी के. बाकिर फेरु जबाब ना मिलल. थोड़ देर बाद ओने से फोन आ गइल. ओह बेरा उहां के स्नान करत रहीं. आ जवन बातचीत उहाँ से भइल ओकरा से हमरो मन तनिका थोड़ हो गइल. हमरा पर जवन चाहे अछरंग लगा ले केहू बाकिर हम कृतघ्न ना हईं. ‍ जेही हमरा साथे कबो कुछ नीमन कइले होखे ओकरा के हम हमेशा इयाद राखिलें. बाकिर भारती जी के शिकायत कुछ अइसने रहल कि हम बिसरा दिहनी उनुका के. “नजर में सितारे जो चमके जरा बुझाने लगी आरती का दिया.” मनोज कुमार के फिलिम पूरब पश्चिम के ई लोकप्रिय गीत जइसन भाव रहल उहाँ के मन में जवन कुछ देर बाद बात में सामने आ गइल.

शुरुआती बातचीत का बाद भारती जी शिकायत कइनी कि पाती के नयका अंक में हमार जवन लेख छपल बा तवना में हम भारती जी के जिक्र अंजोरिया के संस्थापक संपादक का रुप में ना कर के बस एगो होम्योपैथिक डॉ का रुप मे क के निपटा दिहले बानी. भारती जी बतवनी कि जबसे पाती में हमार लेख छपल बा तब से उहाँ का लगे अनगिन फोन आ गइल बा हमरा लेख ले के. पहिले त खुशी मिलल कि पाती के लोकप्रियता सचहूं बा आ लोग ओहमें लिखल लेख पर गौर कइल करेला. अंजोरिया पर केहू कमेंट करे, ना करे, जबाब दे, ना देव बाकिर आपसी बातचीत में लोग कमेंट करे से हिचकिचाव ना.

हम बतवनी कि पुरनका अंजोरिया पर अबहियों उहां के संपादक का रूप में मिल जाएब. हम उहां के एगो संपादकीय के लेख के लिंको भेज दिहनी कि बता दीं सभका के, जिनका ई शिकायत रहल कि अंजोरिया भुला गइल भारती जी के. भारती जी कहनी कि केकरा केकरा के बतावत चलीं. एह पर उर्दू के एगो नज्म याद आ गइल –
रंजिश ही सही, दिल ही दुखाने के लिए आ.
आ फिर से मुझे छोड़के जाने के लिए आ.
किस किस को सुनाऊँगा जुदाई का सबब मैं.
तू मुझसे खफा है तो जमाने के लिए आ.

त सोचनी कि काहे ना एगो पूरा लेखे लिख दीं. भारती जी के शिकायतो दूर हो जाई आ हमहूं अपना मन के बात लिपिबद्ध कर जाएब. अंजोरिया के प्रकाशन करत घरी अतना त अनुभव होइए गइल बा कि साहित्यकार बहुते संवेदनशील होलें. ओह लोग से बहुते सम्हार के बात करे के पड़ेला. एगो बड़का साहित्यकार एहसे अलगा हो गइलन कि हम उनुका के ‘कि’ आ ‘की’ के फरक बतावे के जुर्रत कर लिहनी, एगो साहित्यकार एहले बिलग हो गइलन कि हम जिद्द काहे ठनले बानी कि भोजपुरी में ‘भी’ आ ‘ही’ के प्रयोग ना होखे के चाहीं. उहां के कहनी कि अइसन होइए ना सके. बहुते मौका आवेला जब ‘भी’ भा ‘ही’ के प्रयोग कइला बिना काम ना चल पावे. केहू के ई शिकायत हो जाला कि हम उनुका लेख के मथैला काहे बदल दिहनी भा उनुका लिखलका पर आपन कलम चलावे के जुर्रत कइसे कर बइठनी.

अब आखिर में फेरु संस्थापक संपादक डॉ राजेन्द्र भारती जी के बात पर लवटत बानी. अंजोरिया के शुुरुआत में उहें का संपादक रहनी आ उनही से हमरा दोसरा लिखनिहारन के लिखलका भेंटात रहल अंजोरिया पर प्रकाशित करेला. आ हम हमेशा जबहियों मौका मिलल बा भारती के जिक्र कइला बिना नइखीं रहल. आजुओ पुरनका अंजोरिया पर उहाँ के मौजूदगी मिल जाई. भारती जी के शिकायत रहल कि जब से हम पाती का पाला में चल गइनी तब से हम भुला दिहनी भारती जी के. आ ई बाति हमरा करेजा में धँस गइल. आजु ले केहू हमरा पर ई अछरंग ना लगा सकल कि हम केहू के पाला में बानी. अगर अइसनका रहीत त भोजपुरी संस्था आ सम्मेलनन का सुभाव से हमरो कई गो सम्मान आ पुरस्कार मिल गइल रहीत. हम त ना तीन में ना तेरह में. ऐ छूंछा तोके के पूछा ! आ एहीसे एह लेख का माध्यम से हम एक बेर फेरू रेघरिया दीहल चाहत बानी कि हम ना त एने के हईं ना ओने के. ना त दलित साहित्यकारन के जमात के ना सवर्ण साहित्यकारन के जमात के, ना बाबाजी के ग्रुप के ना बाबू साहब का ग्रुप के, ना श्रीवास्तव ग्रुप के ना पिछड़ा ग्रुप के. हम त कबीर के ओह दोहा के मानेनी कि –
कबीरा खड़ा बाजार में, सबकी पूछे खैर.
ना काहू से दोस्ती, ना काहू से बैर.

उमेद करब कि रउरा सभे अंजोरिया के भोजपुरी सेवा खातिर जानब, ना कि कवनो ग्रुप से जुड़ाव का चलते. हमेशा का तरह अंजोरिया पर हर लिखनिहार के स्वागत बा बिना एह भेदभाव कि ऊ कवना ग्रुप के हवे भा कवनो ग्रुप के हवे कि ना. भारती जी शायद ई बात कह दिहनी, बाकी लोग मनही मन राखत होखी ना अंजोरिया के आजु ई हालात ना रहीत कि बाइस बरीस से प्रकाशन में रहला का बावजूद एहिजा आवे वाला पाठक-पाठिकन के भीड़ मौजूद ना मिले, उहो लिखनिहार लोग आपन लेखन ना भेजे जिनकर लिखल पहिलहूं छपत आइल बा. रहल बात भोजपुरी दिशा बोध के पत्रिका पाती से अपना जुड़ाव का बारे में त पाती से हमरा लगातार सामग्री मिलत आइल बा बाकी पाठकन से साझा करत रहे खातिर. आ हमरा लगे त भारती जी के नयका नंबर ना रहुवे बाकिर भारती जी का डायरी में त हमार नंबर हमेशा से मौजूद रहुवे तबे नू ओह डायरी से हमार नंबर निकाल के सनेसा पठा दिहनी.

भारती जी से एक बेर फेरू क्षमायाचना करब कि एह लेख से उहां के कवनो ठेस लागल होखे त माफ करब. अंजोरिया जब ले मौजूद रही, तबले एकरा संस्थापक संपादक का रुप में उनहीं के जिक्र होखल करी. मोदी जी चाहे जतना मशहूर हो जासु भारत के पहिलका प्रधानमंत्री हमेशा जवाहरे लाल कहहिहें.