काल्हु के दिल कोलकाता तृणमूल कांग्रेस के लंगटई देखलसि जब सीबीआई ममता सरकार के दू गो मंत्रियन – फरहाद हकीम आ सुब्रत बनर्जी – का साथही कोलकाता के मेयर रहल सोवन चटर्जी आ विधायक मदन मित्रा के नारदा मामिला में गिरफ्तार क लिहलसि. गिरफ्तारी के खबर सुनते टृणमूलिया निजाम पैलेस में सीबीआई मुख्यालय पर धावा बोल दिहलें. मुख्यमंत्री ममता बनर्जिओ खबर पावते मुख्यालय चहुँप के बवाल काटे लगली. कहली कि एह लोग के गिरफ्यार कइले बाड़ लोग त हमरो के गिरफ्तार कर लोग. कहली कि एह मामिला में एह लोग के गिरफ्तार करे के अनुमति दीहल राज्यपाल के अधिकार में ना हो के स्पीकर का अधिकार में होला आ स्पीकर से अनुमति नइखे लीहल गइल. जाने जोग बा कि चुनाव का बाद अबहीं ना त प्रोटेम स्पीकर बाड़ें ना स्पीकर के चुनाव भइल बा. एह हालात में राज्यपाल का हाथ में अनुमति देबे के अघिकार रहुवे.
बाद में अउरी उलट फेर देखे के मिलल जब सीबीआई के विशेष अदालत चारो आरोपियन के जमानत दे दिहलसि. एकरा बाद सीबीआई कोलकाता हाई कोर्ट में गोहार लगवलसि जहाँ जमानत पर स्टे लाग गइल. अब एह मामिला के सुनवाई 19 मई के होखी.
एह पूरा प्रकरण में साफे लउकल कि ममता सरकार संवैधानिक जिम्मेदारी नइखे मानत आ राज्यपाल मजबूरन एकर रिपोर्ट देर सबेर राष्ट्रपति का लगे भेजबे करीहें.

चक्रवाती तूफान ताउते काल्हु गुजरात का तट पार कर लिहलसि. एकरा प्रकोप से गुजरात, कर्नाटक, गोवा, महाराष्ट्र राज्यन में भीषण तबाही होखे के खबर बा. अगवाह जालकारी रहला का चलते डेढ़ लाख से बेसी लोग के बचा के दोसरा इलाका में चहुँपावल दीहल गइल बा. एहसे जान के अधिका नुकसान नइखे भइल बाकिर माल के नुकसान बहुते भइल बा.

आँध्र प्रदेश में हिन्दुवन के निर्बाध धर्मान्तरण का खिलाफ आवाज उठाएवाला सांसद के आर कृष्णम राजू के ओहिजा के ईसाई मुख्यमंत्री जगन रेड्डी के सरकार गिरफ्तार करवा के उनुका पर अत्याचार कर रहल बिया. सुप्रीम कोर्ट में गोहार लगवला का बाद अदालत आदेश दिहलसि कि कृष्णम राजू के मेडिकल जाँच सिकन्दराबाद के सैनिक अस्पताल के मेडिकल बोर्ड से हाई कोर्ट के एगो न्यायाधीश का मौजूदगी में करवावल जाय.

देवरिया के शहर कोतवाली इलाका से पांच गो बदमाशन के गिरफ्तार क के ओहनी का कब्जा से चोरी के ट्रक आ चार किलो चरस बरामद कइलसि पुलिस.

बलिया जिला के चितबड़ागांव इलाका के नगपुरा गाँव के अपना प्रेमिका से मिले चहुँपल प्रेमी के घरवाले पकड़ लिहलें आ ओकरा के अतना पीटलें कि ओकर मौत हो गइल.

भदोही जिला के शहर कोतवाली इलाका के नयनपुर गाँव में एगो हादसा में ट्रैक्टर से धक्का लगला से बाइक सवार मरद मेहरारु घवाहिल हो गइलें. एकरा बाद खिसियाइल लोग ट्रैक्टर में आग लगा दीहल.

जौनपुर में केराकत के थाना प्रभारी के कर्तव्य पालन में लापरवाही आ एगो जिला बदर अपराधी से साँठगांठ करे का आरोप में तत्काल प्रभाव से हवत क्राइम ब्रांच में भेज दीहल गइल बा.

जौनेपुर जिला के सरपतहां इलाका के जमदरा गाँव के एगो लइकी के गला रेत के हत्या कर दिहलें स अज्ञात अपराधी जबकि परिवार के बाकी लोग बरामदे में सूतल रहुवे.

जम्मू-कश्मीर में श्रीनगर का बाहरी इलाका में काल्हु सोमार का दिने तलाशी आ घेराबंदी अभियान का दौरान मुठभेड़ में सुरक्षा बल अल-बद्र के दू गो आतंकियन के जहन्नुम भेज दिहलें.

कच्चा तेल, आ कच्चा माल के दाम बढ़ला का चलते अप्रैल 2021 में थोक महँगाई बढ़ के 10.49 प्रतिशत हो गइल बा.

शेयर बाजारों में काल्हु सोमार का दिने जबरदस्त तेजी देखल गइल. सेंसेक्स 848 अंक आ निफ्टी 245 अंक बढ़ के बन्द भइल. अमेरिकी बाजार में काल्हु मामूली गिरावट आइल बाकिर आजु ओहिजा के बाटदा बाजार का साथही सिंगापुर एक्सचेंज में निफ्टी50 के बायदा कोरोबार में जोरदार तेजी से शुरुआत भइल बा. अमुमान बा का आजुओ देश के शेयर बाजार गैप अप खुलीहें आ जोरदार लिवाली रही.