बांग्लादेश के यात्रा पर गइल प्रधानमंत्री नरेन्‍द्र मोदी कहनी कि भारत आ बांग्‍लादेश दुनु का सोझा व्‍यापार-वाणिज्‍य के एके जइसन अवसर बा. दुनु देश आतंकवादो के खतरा झेलत बा. बांग्‍लादेश के आजादी के स्‍वर्ण जयंती पर ओहिजा के छात्रन ला छात्रवृत्ति के घोषणा कइनी प्रधानमंत्री आ ओहिजा के 50 गो उद्यमियन के भारत में स्‍टार्ट-अप पहल में शामिल होखे ला नेवतनी. भारत का तरफ से बंगबंधु शेख मुजीबुर्रहमान के दीहल गइल गांधी शांति पुरस्‍कार शेख मुजीबुर्रहमान के पुत्री शेख रेहाना लिहली.

असम अउर पश्चिम बंगाल के विधानसभा चुनाव के पहिला चरण के मतदान आजु होखे जा रहल बा.

यूपी के पंचायत चुनाव के घोषणा हो गइल बा. एकर जानकारी राज्य निर्वाचन आयुक्त मनोज कुमार लखनऊ में दिहलन. चुनाव चार रण में होखी आ 15, 19, 26, आ 29 अप्रैल के करावल जाई.

कोविड छूत के बढ़ती का बावजूद केन्द्रीय स्‍वास्‍थ्‍य मंत्री डॉ. हर्षवर्धन भरोसा जतवलन कि कोविड के दुनु टीका पूरा सुरक्षित आ बचावक बा. जान लीं कि अबले देश में पांच करोड पचपन लाख से अधिका कोविड टीका लगावल जा चुकल बा.

महागठबन्हन के गोहार पर बिहार बन्द के असर कई जगहा देखे के मिलल. कुछेक जगहा लोग ट्रेनो का आवाजाही रोके के कोशिश कइल.

बिहार विद्यालय परीक्षा समिति इंटरमीडिएट परीक्षा फल काल्हु जारी हो गइल. महज एकइसे दिन में परिणाम देके देश में एगो नया रिकार्डो बन गइल. विज्ञान, कला, आ वाणिज्य तीनों में लइकिए बाजी मरले बाड़ी सँ. कुल 78.04 प्रतिशत परीक्षार्थी पास भइल बाड़ें.

दरभंगा हवाई अड्डा के नाम मैथिल कवि विद्यापति का नाम पर राखे के प्रस्ताव केन्द्र सरकार के भेजल गइल बा.

नई दिल्‍ली में चलत निशानेबाजी विश्‍व कप प्रतियोगिता में भारतीय टीम पुरूष वर्ग के 50 मीटर राइफल स्‍पर्धा के स्‍वर्ण पदक जीतलसि.

बैंडमिंटन में भारतीय महिला आ पुरूष खिलाडी पेरिस में होखत ऑर्लियंस मास्‍टर्स के सेमीफाइनल में पहुंचले.

पुणे में होखत दुसरका एकदिना क्रिकेट अंतर्राष्‍ट्रीय मैच में भारत से मिलल 337 रन बनावे के लक्ष्‍य छह विकेट गँवा के पूरा करत इंग्‍लैंड भारत के हरा दिहलसि.

शेयर बाजार में शुक का दिने तेजी देखे के मिलल. सोना के दाम में मामूली गिरावट भइल बा.