मुख्यमंत्री बनला का बाद आजु योगी आदित्यनाथ पहिला बेर गोरखपुर के यात्रा पर आइल बानी. पूरा गोरखपुर उनुका स्वागत में लागल बा. योगी अदित्यनाथ आजु गोरखनाथ मंदिर में रात्रि विश्राम करब आ काल्हु मंदिरे में होखे जा रहल यागीराज गंभीरनाथ के शताब्दी पुण्यतिथि समारोह में शामिल होखब. आ साँझ बेरा लखनऊ लवटि जाएब.

30 सितम्बर से पहुले सपा गोल आपन अध्यक्ष चुने के काम कर लेबे के एलान कइले बावे. अखिलेश यादव एकर एलान करत कहलन कि 15 अप्रेल से दू महीना ले सदस्यता अभियान चलावल जाई.

बिहार में अप्रेल महीना से बिजली दर में बढ़ोतरी का खिलाफ आजु विवधानसभा में भाजपा समेत विपक्षी गोल आपन विरोध दर्ज करवलसि. भाजपा के कहना बा कि एह बढ़ोतरी के वापस लीहल जाय आ ट्रांसमिशन में होखे वाला नुकसान के कम क के आपन क्षमता बढ़ावे बिजली विभाग. सरकार का तरफ से बिजली मंत्री के कहना रहल कि जवना दर के एलान भइल बा ओहमें सबसिडी शामिल नइखे. सरकार चाहत बिया कि सबसिडी बिजली कंपनियन के ना दे के सीधे उपभोक्ता के दीहल जाव.

सारण जिला के जनता बाजार इलाका में आजु पुलिस छापामारी क के दू गो शराब तस्करन के 12 सौ बोतल विदेशी शराब का साथे गिरफ्तार क लिहलसि. नवादा, सुपौल आ जमुईओ में छापेमारी क के ढेरे शराब बरामद कइल गइल बा. कुल मिला के दस गो तस्करन के गिरफ्तारी भइल बा.

एगो सोना व्यापारी के हत्या का खिलाफ आजु भोजपुर में व्यवसायी लोग बन्दी क के आपन विरोध जतावल.

यूपी में नाजायज बूचड़खाना का खिलाफ होखत कार्रवाई का खिलाफ गोश्त व्यापारी काल्हु से बेमियादी हड़ताल के एलान कइले बाड़ें. एह बीच गैरकानूनी रुप से चलावल जात बूचड़खाना का खिलाफ कार्रवाई आजुओ जारी रहल. अमरोहा के हसनपुर इलाका के एगो गाँव में छापा मार के एगो बूचड़खाना से गाय के खाल, गोड़ वगारह मिलला का बाद एगो कसाई के गिरफ्तार क लीहल गइल बा.