बरफीवाला विद्यालय के प्रेक्षागृह लड़िका लड़िकियन से पूरा भरल बा. मंच पर आधा दर्जन डांसर जुटल बाड़े बाकिर मुख्य गायक के इंतजार हो रहल बा. तबले पता चलत बा कि मुख्य गायक के तबियत खराब बा. अब का होई? तले ले आवत बा एगो बांका नौजवान आ आवते रंग जमा देत बा हरे रामा हरे कृष्णा से. गाना के कड़ी बा केहू से दिल यदि जोड़ऽ भाई, जनमो जनम ले ना छोड़ऽ भाई. पूरा हॉल सीटियन से गूंजे लागत बा. कालेज के ब्यूटी क्वीन रानी के त दिले बेकाबू हो जात बा आ उहो अपना आधा दर्जन सहेलियन का साथे मंच पर आ के शुरुहो जात बाड़ी, हरे रामा हरे कृष्णा….

ई नजारा रहुवे श्री वी इंटरनेशनल प्रोडक्शन का बैनर में बनल निर्माता अशोक गुप्ता के फिल्म दिल के जवना के निर्देशन करत बाड़े एम॰आई॰राजा. मुख्य भूमिका में प्रवेशलाल यादव आ पाखी हेगडे के जोड़ी बा. निर्माता का मुताबिक ई म्यूजिकल रोमांटिक फिल्म बा. कहानी का बारे में बतवलें कि रानी अमर के दिल त दे देत बाड़ी बाकिर बीच में एगो दुर्घटना घट जात बा आ रानी के जिनिगी के रंगे बदल जात बा. फेर का होत बा, कइसे सबकुछ ठीक होखत बा एकरा खातिर त फिल्मे देखे के पड़ी.

दिल में भोजपुरिया महानायक कुणाल सिंह दादा के यादगार भूमिका में, कॉमेडी किंग मनोज टाइगर आ ऋतु पाण्डे के जोड़ी का साथ एयाज खान, मेहनाज, स्वाति वर्मा, आ अवधेश मिश्रा के मजगर भूमिका बा. गीत प्यारेलाल यादव कविजी, आ एस के चौहान के, संगीत मधुकर आनन्द के, नृत्य निर्देशन कानू मुखर्जी के, कथा पटकथा एमआई राज के, संवाद एस के चौहान के, छायांकन अकरम खान के, एक्शन शकील शेख के आ संपादन कोमल वर्मा के बा. हरीश गुप्ता एकर सह निर्माता हउवें जे बतवलें कि फिल्म के शूटिंग एही महीना पूरा करा लिहल जाई.

(स्रोत : प्रशान्त निशान्त)