शनिचर का भोर में नालंदा मेडिकल कॉलेज का सामने का तालाब से तीन लोग के लाश निकालल गइल. एह तीनो के हाथ गोड़ गमछी से बान्हल रहुवे आ देह पर गोली लागे के निशानो मिलल बतावल जात बा. पोस्टमार्टम का बाद पता चली कि गोली लागल रहे कि चोट के निशान ह.
मरे वाला तीनो जन बलिया जिला के चांदपुर के रहलें जे एगो ट्रक पर दिल्ली से लोहा लाद के पटना खातिर चलल रहलें. ऊ ट्रक पटना के रानीपुर पैजाबा में एगो मोबिल दोकान का सोझा खड़ा मिलल रहे. ट्रक पर लिखल नंबर पढ़ के दुकानदार ट्रक मालिक के फोन कइलसि तब जा के सगरी मामिला खुलल. पुलिस के हैरानी एह बात पर बा कि जब माल ट्रक पर मौजूद मिलल तब एह लोग के हत्या के कारण का रहुवे.