बलिया जिला पैकफेड के इंजीनियर हंदयानंद चौबे नगर विधायक नारद राय का खिलाफ थाना में शिकायत दर्ज करवले बाड़न कि विधायक उनुका से मारपीट कइलन, धमकवलन आ निर्माण कार्य में रुकावट पैदा कइलन. ओने इंजीनियर का खिलाफ सपा नेता भीम सिहं शिकायत लिखववले बाड़न कि निर्माण कार्य में गड़बड़ी कर के रुपिया गबन कइल जात बा.

जाने के बात ई बा कि जिला अस्पताल में पुरनका इमरजेंसी के तूड़ के ओहिजा एगो नया इमरजेंसी बनावल जात बा. एह पर आरएसबीवाई से चार करोड़ रुपिया के आवंटन बा. बहुत दिन से रुकल काम कुछुए दिन पहिले शुरू भइल रहुवे कि ई बवाल खड़ा हो गइल बा. विधायक नारद राय के कहना बा कि ओह जगहा पर नया इमंरजेंसी ना बना के ट्रामा सेंटर बनावल जाई आ एकरा खातिर मंजूरी मिल चुकल बा.