साहित्य अकादमी बरीस 2021-22 ला डॉ अशोक द्विवेदी के “भाषा सम्मान” देबे के घोषणा कइले रहुवे. कोरोना प्रोटोकॉल का चलते दू बरीस ले कवनो समारोह ना कइलसि साहित्य अकादमी. एह साल 11 से 16 मार्च 2023 ले चलल साहित्योत्सव में 13 मार्च का दिने ई सम्मान दीहल गइल. देश के विभिन्न क्षेत्रन से आइल विद्वान साहित्यकारन का बीच अकादमी के उपाध्यक्ष प्रो० कुमुद शर्मा का हाथे पुष्पगुच्छ अउऱ अध्यक्ष डॉ माधव कौशिक का हाथे अंगवस्त्र अउर सम्मान चिन्ह दीहल गइल. एकरा बाद अकादामी के सचिव के० श्रीनिवासन का आमन्त्रण पर आपन उद्गार व्यक्त करत डॉ द्विवेदी अकादेमी के प्रति कृतज्ञता जतावत कहनी कि लोकभाषा में लोकभाव अउर समाज के जीवन-संस्कृति के मौलिक अभिव्यक्ति होखेला. हिन्दी के सर्वश्रेष्ठ साहित्य,एही  लोकभाषावन से समृद्ध भइल बा.