लखनऊ, 19 अगस्त (आईएएनएस). उत्तर प्रदेश के राहत आयुक्त के. के. सिन्हा बतवले कि एह साल जुलाई से अब ले भारी बरखा आ बाढ़ से मकान-दीवार ढहला, पेड़ गिरला समेत बरखा से जुड़ल दोसरो हादसा में 77 लोग के मौत हो चुकल बा.

ऊ बतवले कि एह मानसून में राज्य के 72 में से 46 जिला में औसत से बेसी बरखा भइल बा. राज्य के 14 जिला घाघरा, शारदा आ दोसरा बड़की नदियन के बाढ़ से प्रभावित भइल बा.

राज्य के 300 से बेसी गांवन के करीब तीन लाख आबादी बाढ़ से प्रभावित भइल बा आ बड़हन मात्रा में खरीफ के फसल बरबाद भइल बा.
(इंडो-एशियन न्यूज सर्विस)