लखनउ में भाजपा के नेता लोग से बतियावत संघ के सह कार्यवाह सुरेश सोनी कहलन कि सभे नरेंद्र मोदी के पक्ष में लामबंद होके सुर में सुर मिलवले रह. मोदी के नेतृत्व पर कवनो तरह के अहजह के गुंजाइश नइखे. जनता मोदी के चाहत बिया आ अगर भाजपा एहमें एने ओने कइलसि त फेर अइसन संजोग ना भेंटा पाई. अबकी त कबहू ना. संघ के एह तरह खुल के मोदी का पक्ष में आ गइला से भाजपा कार्यकर्तन का मन में उछाह आ गइल बा. सुरेश सोनी का संगे भइल बइठक में भाजपा का अलावे विश्व हिंदू परिषद, बजरंग दल आ विद्यार्थी परिषद समेत सगरी अनुषांगिक संगठनन के पदाधिकारी शामिल रहलें. सुरेश सोनी सभका के कहलन कि नरेन्द्र मोदी का पक्ष में माहौल बनावे लोग.