नयी दिल्ली 21 जुलाई (वार्ता). जीएसटी परिषद आजु अपना बइठक का बाद सेनिटरी नैपकिन, राखी, मूर्ति, कंपोस्ट, सिक्का, साल के पत्तियन से बनल दोना अउर पत्तल, अलगा से पोषक तत्त्व मिलावल दूध जइसन कईएक सामान पर से जीएसटी हटा दिहलसि.
परिषद के आजु एहिजा 28वीं बइठक का बाद वित्त मंत्री पीयूष गोयल बतवलन कि सेनिटरी नैपकीन, राखी, क्वायर, कंपोस्ट, फूलझाड़ू, साल के पत्ता से बनल दोना अउर पत्तल, अलगा से पोषक तत्त्व मिलावल दूध, सिक्का, पत्थर, संगमरमर अउर लकड़ी के मूर्तियन के कर मुक्त क दीहल गइल बा. एकरा अलावे कई एक सामानन पर लागे वाला जीएसटी का स्लैब में बदलाव क के कम कइल गइल बा. जइसे कि हाथ से बनल दरी पर 12 से घटाके 5 प्रतिशत, बाँस के फ्लोरिंग, केरोसिन के प्रेशर स्टोव, जिप अउर स्लाइड फास्टनर पर 18 से घटाके 12 प्रतिशत, आ इथेनॉल पर 18 प्रतिशत से घटाके 5 प्रतिशत कइल गइल बा.
घरेलू उपयोग के इलेक्ट्रॉनिक उपकरण जइसे कि वाशिंग मशीन, वैक्यूम क्लीनर, मिक्सर, वाटर कूलर, मिल्क कूलर, आइसक्रीम फ्रीजर, लीथियम-आयन बैटरी, पेंट अउर वार्निश वगैरह पर अब 28 फीसदी जीएसटी का बदले अठारहे प्रतिशत जीएसटी लागल करी. बिना पॉलिश के पत्थर पर कर के दर घटा के पाँच प्रतिशत क दीइल बा
वित्त मंत्री गोयल बतवले कि नव घंटा चलल बइठक में राय-विचार का बाद 55 से अधिका तरह के सामान पर जीएसटी घटावल गइल बा. ई नयका दर 27 जुलाई से लागू होखी.
ई-बुक्स पर लागे वाला 18 प्रतिशत जीएसटी घटा के 5 प्रतिशत क दीहल गइल बा. आयुष्मान भारत खातिर दीहल प्रीमियम पर कवनो जीएसटी ना लागी.
परिषद के अगिला बइठक 4 अगस्त के होखी जवना में महज सूक्ष्म, लघु अउऱ मध्यम उद्योगन से जुड़ल मुद्दन पर राय-विचार कइल जाई.