भोजपुरी परदा के सबले लोकप्रिय अभिनेत्री पाखी हेगडे निर्माता आ निर्देशको लोग के पसन्दीदा हई. एह चलते उनुका लगे काम के बोझ अतना बा कि कबो कबो उनका छत्तीस छत्तीस घंटा ले शूटिंग करावे के पड़ जाला. दिन में “संतान” के शूटिंग करत बाड़ी त रात में “रामपुर के लक्ष्मण” खातिर एगो खास गाना के शूटिंग. दिन में असलम शेख निर्देशित फिल्म “भईया हमार दयावान” के शूटिंग त रात में अभय सिन्हा के फिल्म “बिदेसिया” के शूटिंग. कहेली कि निर्माता के ध्यान राखहीं के पड़ेला काहे कि ओह लोग के पूंजी लागल रहेला सिनेमा में आ काम रुकला पर भा देरी होखला से ओह लोग के बहुते नुकसान हो जाला. अपना एह गुनी सुभाव का चलते पाखी हेगडे के सफलतो डबल रेट से मिलेला. जइसे कि हाल ही में रिलीज फिल्म “आखिरी रास्ता” बिहार में कमाल कइले बा त मुंबई में उनकर फिल्म “लोफर” के धूम मचल बा. आजुकाल्हु पाखी हेगडे के नाहियो त दर्जन भर से बेसी फिल्म फ्लोर पर बाड़ी सँ.
(स्रोत – प्रशान्त-निशान्त)