चार दिन के वियतनाम दौरा पर राष्ट्रपति प्रणव मुखर्जी वियतनाम चहुँपलन. दिल्ली में उनुका के प्रधानमंत्री नरेन्द्र मोदी औपचारिक विदाई दिहलन.

केन्द्रीय महिला आ बाल विकास मंत्री मेनका गांधी कहले बाड़ी कि देश में व्यापार खातिर होखे वाला जानवरन के कत्ल रोकल जाव. कहली कि आजु दुनिया भर में सबले अधिका माँस एहिजे से निर्यात होत बा.

इराक आ सीरिया में आतंक पसरले इस्लामिक स्टेट का खिलाफ बनावल जात गठबंधन में आस्ट्रेलिया खुल के सामने आइल.

प्रवीण तोगडि़या कहलन कि गुजरात आ दोसरो जगहा नवरात्रि के मौका पर होखे वाला गरबा समारोहन में मुस्लिम लड़िकन के मत घुसे दिहल जाव काहे कि ई धार्मिक समारोह होला.

जो विल्फ्रेड सोंगा आ रिचर्ड गास्के के शानदार प्रदर्शन का चलते फ्रांस चार साल बाद डेविस कप विश्व ग्रुप के फाइनल में चहुँपल.

गोरक्षपीठ के पीठाधीश्वर महंत अवैद्यनाथ के उनकर उत्तराधिकारी आ सांसद योगी आदित्यनाथ के आजु गोरक्षापीठ में साधु समाज पीठाधीश्वर आ महंत के उपाधि दिहलें. अब से उनुका के महंत आदित्यनाथ कहल जाई.

बक्सर से भाजपा सांसद आ नीतीश सरकार में स्वास्थ्य मंत्री रहल अश्विनी कुमार चौबे दवा घोटाला के जाँच सीबीआई से करवावे के मांग कइले बाड़न. कहलन कि सब कुछ नीतींश का इशारा से भइल एहीसे जदयू जाँच नइखे करवावल चाहत.

अमेठी के डीएम जगतराज त्रिपाठी बतवलन कि संजय सिंह आ उनुका बेटा का तरफ से भइल मारपीट मे 18 लोग घाहिल आ एगो सिपाही के मौत भइल बा.

नारकोटिक्स कंट्रोल ब्यूरो के दिल्ली यूनिट अफगानिस्तान से तस्करी क के आवत 31 किलोग्राम हेरोइन जब्त कइलसि.

भाजपा प्रवक्ता माधव भंडारी बतवलन कि महाराष्ट्र में सीट बँटवारा पर भाजपा आ शिवसेना के बीच बातचीत रूक गइल बा.

बिजली पानी कटला का बाद आखिर में रालोद नेता अजित सिंह सरकारी घर खाली कइलन. पहिलहीं खाली कर देतन त फजीहत त ना भइल रहीत.

उन्नाव से बीजेपी सांसद साक्षी महाराज पूछलन कि मदरसा आ बाकी स्कूलन के पाठ्यक्रम अलहदा काहे? कहलन कि आतंक के क्लास का जगहा सामान्य पढ़ाई होखे के चाहीं.

बोको हराम का इलाका में लापता हो गइल नाइजीरियाई एयर फोर्स के हवाईजहाज.

संतन का मौजूदगी में महंत अवैद्यनाथ के समाधि दिआइल.

फ्रांस सरकार भारत में 100 स्मार्ट सिटी बनावे के प्रधानमंत्री नरेंद्र मोदी के योजना में सहभागी बने के मनसा जतवलसि.

हिंदी दिवस का मौका प देश को गृहमंत्री राजनाथ सिंह शुभकामना दिहलें आ हिंदी के प्रचार-प्रसार आ प्रयोग बढ़ावे के गोहार लगवले.

जम्मू कश्मीर में पहिले कुछ दिन ला राष्ट्रपति शासन लगावल जाए आ ओकरा बाद चुनाव करावे के बात कहलन सुब्रह्मणियम स्वामी

अफगानिस्तान में तैनात रहल मिशन कमांडर के अमेरिका इस्लामिक स्टेट के आतंकियन का खिलाफ चले वाला अंतरराष्ट्रीय अभियान के कोआर्डिनेटर बनवलसि.

यूपी के बुलंदशहर दू गो लड़िकियन के लाश मिलल. गैंगरेप का बाद हत्या के अनेसा.

भाजपा के राष्ट्रीय अध्यक्ष अमित शाह हरिद्वार में पतंजलि सेवा सदन के उदघाटन कइलन.

लगातार दुसरको साल जेएनयू छात्रसंघ चुनाव में चारो सीट पर सीपीआई एमएल के छात्र संगठन जीतल.

नेशनल पैंथर्स पार्टी के भीम सिंह के कहना बा कि राहत चहुँपावे वाला लोग पर पथराव कइल राष्ट्र विरोधी हरकत ना हो के सरकार से आपन नाराजगी जतावे के तरीका ह.

श्रीलंका के मछुआरन के मालद्वीप का समुंद्र मार्ग से अरब सागर में बेरोक-टोक आए-जाए देबे के मांग मालद्वीप सरकार ना मनलसि.

उत्तराखंड में एगो बस गड़हा में गिरल. 16 जने के मौत.

सड़क पर गिरल मलवा सेना साफ क दिहलसि आ जम्मू श्रीनगर नेशनल हाईवे-1ए पर यातायात बहाल हो गइल बा.

श्रीनगर के अनेके इलाका मे होखत तेज बरखा का चलते रहत के काम रुकल. कई जगहा अबहियों 8 से 10 फीट ले गहीर पानी.

केंद्रीय स्वास्थ्य मंत्री डॉक्टर हर्षवर्धन जम्मू कश्मीर जात बाड़न जहाँ राहत के काम ला दवाईयन के कमी बतावल जात बा. कहलन कि राज्य प्रशासन से मिलके समस्या हल करे के कोशिश करीहें.

कांग्रेस नेता दिग्विजय सिंह ट्वीट क के ISIS के कारनामा के निंदा आ साथ ही भारत के मुसलमानन के बधाई दिहले बाड़न.

झारखंड में होखत बरखा का चलते बिहार में ओकरा से सटल चार गो जिला में अलर्ट जारी.

दिल्ली में बूना बुनी के सिलसिला अबहीं कुछ दिन अउर ले जारी रह सकेला.

---

टटको में टटका खबर