भोजपुरी मेगा स्टार मनोज तिवारी के रिकार्ड पर रिकार्ड तोड़त फिलिम ‘गोबर सिंह’ उत्तर प्रदेश में हंगामा मचवला क बाद अब मुंबई में रहे वाला उत्तर भारतीयन के दिल जीते आवत बिया. फिलिम मुंबई में 30 अगस्त के रिलीज होखी. यूपी के मीडिया एह बात के खुबे रेघरियवले बा कि एह फिलिम के सफलता से तय होखी कि लोग कवना तरह के भोजपुरी फिलिम देखल चाहत बा. एह फिलिम के मीडिया हाथो हाथ लिहले बा. सभे एकर तारीफ कइले बा आ कुछ के कहना बा कि एह फिलिम के अवार्ड मिले के चाहीं.

फिलिम के निर्देशक बॉबी सिंह के कहना बा कि ‘गोबर सिंह’ के भूमिका दुइए आदमी कर सकत रहुवे. हिंदी में राजकपूर आ भोजपुरी मे मनोज तिवारी. एह फिलिम के नायिका बाड़ी रिंकू घोष. साथी कलाकारन में पारुल यादव, संतोष सिंह, फूल सिंह, नवल किशोर, राकेश त्रिपाठी, मोना राय, विकास सिंह वीरप्पन, प्रभुनाथ सिंह, राजेश तोमर, खुद निर्देशक बॉबी सिंह, आ महाराष्ट्र के कांग्रेसी नेता कृपा शंकर सिंह शामिल बाड़े,

फिलिम में आठ गो गाना बा जवना के लिखले बाड़े श्याम देहाती अउर राजेश मिश्रा आ संगीत दिहले बाड़े लाल सिन्हा. संवाद लेखक राकेश त्रिपाठी आ मनोज कुशवाहा हउवें.

(शशिकांत सिंह, रंजन सिन्हा)