अबही ले अपना आइटम डांस से देखनिहारन के होश उड़ावे वाली सीमा सिंह फिल्म ‘लड़ब मरते दम तक’ में इन्स्पेक्टर के किरदार में बदमाशन के छट्ठी के दूध इयाद करावत लउकीहें. दुर्गा फिल्म्स प्रोडक्शन के बैनर तले बनत एह फिल्म के निर्माता संजय कुमार मिश्रा आ निर्देशक पिंटू चटर्जी हउवें.

एह बारे में सीमा सिंह के कहना बा कि उनुका पापा के मन रहे कि बड़ हो के सीमा दरोगा बनसु. असल लाइफ में त सीमा सिंह दरोगा ना बन पवली बाकिर जब रील लाइफ में इन्स्पेक्टर के वर्दी पहिरली त पापा के सपना बरबस याद आ गइल. शूटिंग के सेट पर आंखें भर आइल ई सोच के चलऽ कवनो रूप में पापा के सपना त पूरा कइनी. एह फिल्म में इंसपेक्टर बनल सीमा सिंह किडनी बेचेवाला गिरोह के पर्दाफाश करत नजर अइहें.

फिल्म के शूटिंग पिछला दिने पनवेल के स्वप्न नगरी स्टूडियो में करावल गइल, एह शूटिंग में सीमा सिंह के अलावा विराज भट्ट, शुभम तिवारी, सुप्रेणा सिंह, के.के. गोस्वामी वगैरह खास कलाकार शामिल भइलें.

(शशिकांत सिंह रंजन सिन्हा)