महुआ टीवी के रियलिटी शो के समापन समारोह बहुते भव्य तरीका से राँची के मोरादाबादी मैदान में शुक, २१ मई के रात में भइल जवना में लोकमत का आधार पर गोरखपुर के अविनाश दूबे के विजेता घोषित कइल गइल. परिणाम हर तरह से प्रत्याशित रहल. अविनाश दूबे आ आनन्द इशान का बीच बहुत लमहर दूरी रहल जवन कि दुनु जने के मिलल वोटो से पता चलल. आनन्द इशान के करीब नौ लाख त अविनाश दूबे के सोलह लाख मत मिलल.

पहिले के घोषणा मुताबिके अविनाश के एगारह लाख रुपया नगद, आ एगो मोटरसाइकिल इनाम स्वरूप मिलल जबकि आनन्द इशान के उप विजेताबने खातिर सात लाख रुपिया नगद के पुरस्कार दिहल गइल. खचाखच भरल मैदान में आयोजित कार्यक्रम में मंच पर मनोज तिवारी, रविकिशन, दिनेशालाल निरहुआ, पवन सिंह, मालिनी अवस्थी, श्वेता तिवारी, संभावना सेठ, आ इहाँ तक कि नृत्य कला के बड़की माई कहाये वाली सरोज खानो आपन प्रस्तुति दिहल लोग.

उपस्थित गणमान्य लोग में झारखण्ड के सांसद अर्जुन मुण्डा, विधानसभा स्पीकर सीपीसिंह समेत कई गो राजनेता मौजूद रहलें. विजेता के पुरस्कार मुख्य अतिथि अर्जुन मुण्डा का हाथे दिहल गइल. समारोह का अन्त में अपना दुनु रियलिटी शो सुर संग्राम आ डांस संग्राम के सफलता से गदगद महुआ टीवी के प्रमुख पी के तिवारी घोषणा कइलें कि दुनु शो के दुसरका संस्करण जल्दिये पेश कइल जाई. अगर हमार अनुमान गलत ना निकले त सुर संग्राम दू के एंकर फेर से मनोजे तिवारी होखीहन.