बिहार के चुनाव परिणाम आवे से पहिलहीं कांग्रेस में भगदड़ शुरु हो गइल बा आ आजु शुक का दिने असम में कांग्रेस के 9 गो विधायक बाकायदा भाजपा में शामिल हो गइलन. जान जाईं कि बिहार के चुनाव का बाद अगिला साल बंगाल, असम आ केरल के चुनाव होखे वाला बा.
126 सदस्य वाली विधानसभा में अबहियों कांग्रेस के 68 गो विधायक बाड़ें आ ओकर बहुमत बरकरार बा.
भाजपा में एह विधायकन के स्वागत करत भाजपा नेता उमेद जतवलें कि ई लोग असम आ भाजपा के बढ़न्ती ला काम करी. एह मौका पर मौजूद भाजपा नेता राम माधव कहलन कि असम में भाजपा छोड़ दोसर कवनो विकल्प नइखे रहि गइल.