अग्नि क्रिएशन के बैनर तले बने जात ‘अग्नि’ के संगीतमय मुहूर्त पिछला दिने चार बंगला, म्हाडा के स्वरलता रिकार्डिंग स्टूडियो में करावल गइल. एह मौका पर संगीतकार शत्रुघ्न के निर्देशन में गायिका वर्षा तिवारी के आवाज़ में एगो रोमांटिक गीत रिकार्ड भइल. वइसे एह फिल्म में आठ गो गाना बा जवना के गीतकार हउवें प्यारे लाल यादव आ गौतम. निर्देशक ए.एस. नाथन कथा आ पटकथो लिखले बाड़न. कोरियोग्राफर मुर्गन, एक्शन वाली तेजा आ कैमरामैन विलियम्स.

एह फिलिम ला मनोज पाण्डे, मनोज टाइगर आ अर्पिता माली के चयन हो गइल बा. नायिका आ बाकी कलाकारन के चुने के काम चलत बा.

फिल्म के बारे में निर्देशक ए.एस. नाथन बतवलन कि एगो एक्शन फिल्म ह जवना का जरिए नवहियन के एगो संदेशा दिहल जाई. एह फिलिम में पहिला बेर भोजपुरी में साउथ इंडियन स्टाइल के एक्शन देखे के मिली.

मुहुर्त पर बिरहा सम्राट अभिनेता विजय लाल यादव, दीपक भाटिया, बालेश्वर सिंह, गोपाल राय, धर्मेश, लल्लन सिंह, नूर कुरैशी, शिवांशु पाण्डे, अशोक जैन, दक्षिण भारत के ‘थीना ठंडी’ अखबार के पत्रकार दुरई आ अउरिओ खासमखास लोग मौजूद रहल.

(स्रोत समरजीत)