खा पी के हाथ झार के चल गइलें कांग्रेस के युवराज राहुल गाँधी. ना ऊ सोचलन ना उनुकर लगुआ भगुआ कि गरीब परिवार उनुका आवभगत के खरचा से कइसे निबटी. अब खबर बा कि राहुल के खाना खिआवे ला करजा उठावा वाला स्वामीनाथ के गरीब परिवार कइसे उतारी ई करजा. वइसे संस्कार रहीत एह नेता में त जात घरी घर के बचवन का हाथ में कुछ दे गइल रहतन भा कांग्रेस ओह आदमी के कुछ आर्थिक सहायता कर दीत.

सत्तर चूहा खइला का बाद हज करे निकले वाला कहावत के सही ठहरावल यूपी के मुख्यमंत्री अखिलेश यादव अपना दू गो मंत्रियन के बरखास्त क दिहलन. खनन मंत्री गायत्री प्रजापति आ पंचायती राज मंत्री राजकिशोर पर भठियरपन के आरोप लागल करत रहुवे बाकिर अब कपारे चुनान आइल बा त आपन छवि साफ करे के कोशिश करत बाड़न. एहमें प्रजापति मुलायम के करीबी आ राजकिशोर शिवपाल के करीबी हउवन.

बिहार के सारण जिला के बनियापुर इलाका के कन्होली मनोहर गांव में सोमार का दिने एगो पोखरा में नहाए घुसल दू गो बच्चियन आ एगो बच्चा के डूब के मौत हो गइल. तीनो लाश बरामद हो गइल बा आ पोस्टमार्टम ला जिला मुख्यालय के छपरा सदर अस्पताल भेज दिआइल बा.

केकड़ा पकड़े ला गड़ही में उतरल दू गो बचवा यूपी के बलिया जिला के रेवती इलाका के तुलसी छपरा गाँव में डूब के मर गइलें. एगो बच्ची के डूबे से बचा लीहल गइल. दुनू बचवन के लाश गड़ही से निकाल लीहल गइल बा.

बसपा में मचल भगदड़ का जारी राखत सोमार का दिने मायावती के चार गो सिटींग विधायक भाजपा में शामिल हो गइलन. भाजपा के यूपी अध्यक्ष केशव मौर्य के कहना बा कि बसपा में मचल भगदड़ खतम नइखे होखे वाला.