केरल स्टोरी फिल्म पिछला साल रिलीज भइल रहुवे. आजु दूरदर्शन ओकरा के अपना चैनल पर देखावे के एलान कइले बावे. देखाई कि ना, देखा पाई कि ना, से त नइखौं जानत. काहे कि केरल के मुख्यमंत्री पिनाराई विजयन निहोरा कइले बाड़न कि दूरदर्शन ‘केरल स्टोरी’ के प्रसारण के आपन फैसला रद्द कर देव काहे कि चुनाव का बेरा एह फिलिम के देखवला से समाज में स‌ाम्प्रदायिक तनाव बढ़ जाई.

अगर उनुकर मानीं त ई फिलिम केरल के सेकूलर छवि बिगाड़े के साजिश का चलते बनावल गइल आ ई राष्ट्रीय स्वयंसेवक संघ आ भारतीय जनता पार्टी के प्रचार करे वाली फिलिम हवे.

अपना एक्स (ट्वीटर) अकाउन्ट पर एगो पोस्ट कइले बाड़न पिनराई विजयन –

The decision by @DDNational to broadcast the film 'Kerala Story', which incites polarisation, is highly condemnable. The national news broadcaster should not become a propaganda machine of the BJP-RSS combine and withdraw from screening a film that only seeks to exacerbate…

— Pinarayi Vijayan (@pinarayivijayan) April 4, 2024

विजयन के कहना बा कि, ध्रुवीकरण करावे वाली फिलिम ‘द केरल स्टोरी’ के दूरदर्शन पर प्रसारित करे के फैसला बहुते निंदनीय बावे. दूरदर्शन के भाजपा-आरएसएस गठबंधन के प्रचार मशीन ना बने के चाहीं आ अइसन फिलिम ना देखावे के चाहीं जवना से सांप्रदायिक तनाव बढ़े. केरल एह तरह के नफरती प्रयास के हमेशा आ पूरजोर विरोध करी.

जाने जोग बा कि दूरदर्शन ‘द केरल स्टोरी; फिलिम के प्रसारण आजु करे के एलान कइले बावे.

केरल के नेता-विपक्ष वीडी सतीसनो के कहना बा कि कांग्रेस पार्टी एह फिलिम के प्रसारण रोकवावे खातिर चुनाव आयोग का लगे जाई काहे कि ई आचार संहिता के उल्लंघन होखी.

फिलिम वइसे त मलयालम में बनल रहुवे बाकिर पूरा देश मेें रिलीज करे खातिर एकरा के हिन्दी में डब करावल गइल बा. फिलिम त हिन्दी में बा आ दस महीना पहिले रिलीज हो चुकल बा आ देश भर के बहुते लोग एकरा के देख चुकल बा.

पिनराई विजयन के विरोध पर केन्द्रीय मंत्री वी मुरलीधरन के कहना बा कि लेफ्ट फ्रंट त हमेशा अभिव्यक्ति के स्वतंत्रता के पक्षधर रहल बावे. त फेर एगो फिलिम के प्रसारण के विरोध काहे कइल जा रहल बा. दोसरे ई फिलिम सेंसर बोर्ड से पारित हो चुकल बा आ एकरा पर रोक लगावे से न्यायालयो इंकार कर चुकल बाड़ी सँ.

समाचार के परिभाषा होला कि जवना बात के केहू दबावे भा लुकावे के चाहे ऊ खबर होला आ जवना के फैलावे चाहे ओकरा के विज्ञापन कहल जाला. विज्ञापन देखावे खातिर पइसा मिलेला आ लोग विज्ञापन देखे एह खातिर ओकरा के समाचार का साथे देखावल जाला.

अगर अबहीं ले रउरा एह फिलिम के नइखीं देखले त आजु आ अबहियें एहिजे देख लीं. कुछ दृश्य भयावह भा खराब लाग सकेला एकरा के ध्यान में राखिये के देखीं. हो सके त बचवन के एह फिलिम से फरका राखीं.