पाकिस्तान का जेल में बंद कुलभूषण से उनुकर महतारी आ मेहरारु के भेंट त करवा दिहलसि पाकिस्तान बाकिर आपन कमीनापंथी देखावे से बाज ना आइल. एह मुलाकात के मुलाकात ना कहि के वीडियो कॉन्फेरेंसिंग कहल अधिका सही रही. काहें कि एह भेंट का दौरान शीशा के देवाल रहुवे ओह लोग का बीच में आ इन्टरकॉम का सहारे बतियावल लोग. पाकिस्तान एह लोग के अपना मन से बातो ना करे दिहलसि. पहिले से तय सवाले जवाब कर पावल ई लोग. आ हमरा किहां के हाल ई बा कि हमनी के विदेशमंत्री आए दिन कवनो ना कवनो पाकिस्तानी के वीजा बाँटत रहेली.

गुजरात विधानसभा चुनाव में लगातार छठवाँ बेर जीतल भाजपा के सरकार के किरियाधराई समारोह काल्हु मंगल का दिने होखे जा रहल बा. विजय रुपाणी मुख्यमंत्री पद के आ नीतीन पटेल उप मुख्यमंत्री पद के किरिया लीहें. एह खुशगवार मौका प भाजपा के राष्ट्रीय अध्यक्ष अमित शाह, प्रदेश अध्यक्ष जीतू वघानी का साथही बिहार के मुख्यमंत्री नीतीश कुनार आ उप मुख्यमंत्री सुशील मोदी मौजूद रहीहें.

सिख समुदाय के दसवाँ गुरु गोविन्द सिंह जी के 351वाँ जन्मोत्सव मनावल जा रहल बा. पटना सिटी के तख्त श्रीहरिमंदिर जी में आजु शुकराना समारोह मनावल गइल. एहीजे गुरु गोविन्द सिंह जी के जनम भइल रहुवे. आजु अधरतिया में मुख्य जन्मोत्सव मनावल जाई. एह समारोह में शामिल होखे ला दुनिया भर से सिख श्रद्धालु पटना साहिब मे जुटल बाड़ें.

आजु पंडित मदनमोहन मालवीय जी के जनमदिन प संसद में आयोजिल कार्यक्रम में कवनो मंत्री के शामिल ना भइला प सुब्रह्मणियम स्वामी आपन नाराजगी ट्वीट क के जतवलें कहलन कि बहुते दुख के बाति बा कि एह मौका प जुटे के समय ना मिल सकल कवनो मंत्री के.

जेल में अपना सजा के इन्तजार करत चारा चोर का नाम से मशहुर लालू प्रसाद के ट्वीटर अकाउन्ट अब उनुका परिवार के लोग सम्हारी आ उहे लोग राजद समर्थकन के एकजुट बनवले राखे के कोशिश करी. अनेसा जतावल जा रहल बा कि लालू के जेल गइला का बाद उनुका गोल के लोग छितरा सकेला. आजु लालू से भेंट करे ला उनुका समर्थकन के भीड़ रांची के बिरसा मुंडा केंद्रीय कारा प मँडरात रहि गइल बाकिर जेल प्रशासन भेंट करे के इजाजत ना दिहलसि काहें कि ई काम जेल मैनुअल का खिलाफ होखीत.

नोएडा का बारे में कहल जाला कि जेही मुख्यमंत्री एहिजा के दौरा कइल ओकर कुरसी छिना गइल आ एही चलते बरीसन से कवनो मुख्यमंत्री नोएडा आवे के हिम्मत ना कइलन. अब योगी आदित्यनाथ एह बाति के झूठ करे ला दू बेर नोएडा के दौरा क चुकलन. उनुका एह काम के बड़ाई आजु अपना भाषण में पीएम मोदी कइलन आ कहलन कि एह अंधविश्वास के तोड़े के कोशिश क के योगी बढ़िया काम कइले बाड़न.
Upload Music Files – Podcast Hosting –

अब कुछ छुटपुट खबर भोजपुरी पट्टी से –

देवरिया में कड़ाका के पाला पड़त देख ओहिजा के स्कूलन के 27 लारीख ले बंद करे के आदेश जारी हो गइल बा.

जौनपुर के सिंगरामऊ इलाका के जमउपट्टी गांव में एगो बेकाबू ट्रैक्टर सड़क किनारे का मकान में घुस गइल आ एह हादसा में बरामदा में बइठल एगो आदमी के दबा के मौत हो गइल.

सारण जिला के भेलदी इलाका से एगो गाँजा तस्कर के पुलिस दस किलो गांजा का साथे गिरफ्तार कइले बिया.

गाजीपुर कोतवाली इलाका में एगो सड़क हादसा में एक आदमी के मौत हो गइल आ दू जने घवाहिल हो गइलें. मोटर साइकिल चलावत नवही अपना मोबाइल से बतियातो रहुवे जब ई हादसा हो गइल. मोटर साइकिल प पीछे बइठ के जात ओकरा बाप के एह हादसा में जान चलि गइल.

इलाहाबाद उच्च न्यायालय बार एसोसिएशन के अध्यक्ष पद पर इन्द्र कुमार चतुर्वेदी आ महासचिव पद प एसी तिवारी चुनाइल बाड़ें.

गोरखपुर के बेलीपार इलाका के भरवल गाँव के नवहिन लइकी अपना घर का लोग से कहासुनी का बाद फाँसी लगा के जान दे दिहलसि.

आजु के टटका खबर के एहिजे समापन करत बानी. नमस्कार, शुभरात्रि. प्रणाम.