आजु यूट्यूब पर वर्ल्डवाइड रिकॉर्ड्स भोजपुरी के चैनल पर एगो गीत सुनि के मन में सवाल उठल कि ओकरा कइसन लागी जेकर मेहरी सतभतरी बनल चाह ले. असल में एह भोजपुरी गाना के मुखड़ा हवे – ‘एके मेहरी प रहल मुश्किल हो गईल’. गाना के बोल जवन सुन सकनी तवन नीचे देत बानी –

(Screengrab from Youtube video)

मुश्किल हो गइल
एके मेहरी पर रहल मुश्किल हो गइल.

करिलें सवाल त छनक जालऽ हो
दिया लेखा पिया भभक जालऽ हो.
प्यार बाँटऽतारऽ बहरी, हमरा फील हो गइल.
राजा सीना में तोहार कई दिल हो गइल,
एके मेहरी पर रहल मुश्किल हो गइल.

खात बाड़ राजा, ना घोंटात बाड़ऽ राजा,
होखत अन्हार कहां जात बाड़ राजा ?
सईंया कहब ना कलेश कइसे छोड़ देब.
हम अचके में नाता तोहसे तोड़ देब.
हम ……. अब करील हो गइल
सईंया सीना में तोहार कई दिल हो गइल,
एके मेहरी पर रहल मुश्किल हो गइल.

अरे देखऽतानी रहन, हमसे होत नइखे सहन,
दिने दिने हमरा से करत बारऽ दहन.
क के थाक गइनी तोहसे बिअहवा,
कवनो पूरा ना भइल हमार चाहवा.
रवि केकर जवानी कहवां मिल हो गइल,
राजा सीना में तोहार कई दिल हो गइल,
एके मेहरी पर रहल मुश्किल हो गइल.

अभिनेत्री माही श्रीवास्तव पर फिलिमावल एह गीत के गवले बाड़ी खुशी कक्कड़. वीडियो में पुरुष किरदार अवनीश आर्या कइले बाड़न. निर्माता रत्नाकर कुमार के एह म्यूजिक वीडियो के गीत लिखल हवे रवि यादव के आ संगीत हवे विक्की बॉक्स के. सुनील बाबा के निर्देशन में बनल एह वीडियो के फोटोग्राफी गौरव राय आ रंजन के निर्देशन में भइल बा. नृत्यनिर्देशन ऋतिक के हवे. संपादन कइले बाड़न आलोक गुप्ता. पंकज सोनी का बैनर में बनल एह वीडियो के डिजिटल संसकरण बनवले बाड़न रोहन सिंह.
गाना के ऑल राइट वर्ल्डवाइड रिकॉर्ड्स का लगे बा आ एकरा के यूट्यूब पर सुनल जा सकेला.

चूंकि यूट्यूब पर एह बात के अनुमति बा कि एकरा के इम्बेड कइल जा सकेला, एहसे नीचे एकरा के एहिजो देख-सुन सकिलें –