Old file photo

लोकसभा चुनाव के पहिलका डेग अतना सम्हर के उठल कि सगरी गोलन के साँस रुक गइल बा. भाजपा अलगे चिन्तित आ इंडी के गोल अलगे चिन्ता में. असल में शायद भाजपा के समर्थक जीत का गुमान में घाम में निकले से सकुचा गइलन त विरोधी गोल के लोग हार तय मानत महटिया गइल कि का फायदा जव आवे के मोदिए के बा.

18वीं लोक सभा के चुनाव के पहिलका चरण में 62 फिसदी मतदान होखे के खबर बा. ई पिछला चुनाव से कम मतदान बा. संतोष ह पर बा कि पश्चिम बंगाल आ मणिपुर छोड़ अउर कहीं से हिंसा भइला के खबर नइखे मिलल. काल्हु अरुणाचल प्रदेश विधानसभा आ सिक्किम विधानसभा के सगरी सीटन के चुनावो निकहा से निपट गइल बा.
निर्वाचन आयोग बतवले बावे कि सभले बेसी मतदान त्रिपुरा में भइल जहवाँ 80.17 फिसदी लोग वोट डालल. सभले कम वोट बिहार में पड़ल जहवाँ आधो से कम लोग मतदान में शामिल भइल.

काल्हु का चुनाव में आठ गो केन्द्रीय मंत्रियन, दू गो पूर्व मुख्यमंत्रियन आ एगो पूर्व राज्यपाल के किस्मत के फैसला ईवीएम मशीन में बन्द हो गइल. एहमें सड़क आ परिवहन मंत्री नितिन गडकरी, पृथ्वी विज्ञान राज्य मंत्री किरेन रिजिजू, अरुणाचल के मुख्यमंत्री रहल नबाम तुकी, केन्द्रीय जहाजरानी जल मार्ग अउर बंदरगाह मंत्री सर्बानंद सोनोवाल, केन्द्रीय मंत्री संजीव बालियान, प्रधानमंत्री कार्यालय में राज्य मंत्री जितेन्द्र सिंह आ भूपेन्द्र यादव, कानून मंत्री अर्जुन राम मेघवाल, तेलंगाना के राज्यपाल रहल तमिलसाई सौन्दरराजन वगैरह के नाम शामिल बा.

अब ई लोग अपना चुनाव से मुक्त हो के अपना अपना गोलन के प्रचार में लाग जाई.