हालही में सिंगापुर में आयोजित भोजपुरी सोसायटी के कार्यक्रम में समिति का आमंत्रण पर शामिल होखे गइल गोरखपुर के रहे वाला आ भोजपुरी के मशहूर गायक राकेश श्रीवास्तव भोजपुरी गीत आ भजन के गायकी से सिंगापुर में बसल पूरबिया लोगन के मंत्रमुग्ध करके लवटल बाड़े.

लवटला का बाद राकेश श्रीवास्तव बतवले कि सिंगापुर में पूर्वाचल के लाखों भोजपुरिया लोग अपना सांस्कृतिक संगठनन का माध्यम से भोजपुरी संस्कृति के अलख जगा के रखले बाड़े, ऊ लोग विदेश में रहला का बावजूद अपना भोजपुरी संस्कृति से नेह लगवले रखले बा. राकेश श्रीवास्तव के गायकी भोजपुरी सोसायटी, श्री लक्ष्मी नारायण मन्दिर, आर्यसमाज मन्दिर में आइल सभकर दिल जीत लिहलसि. सिंगापुर उत्तर भारतीय हिन्दू महासभा के 90 वें वार्षिकोत्सव आ गीता जयन्ती का अवसर पर एगो विशेष कार्यक्रम के आयोजन भइल जवना में राकेश पूरबी आ होली गीत पेश कर के खूब वाहवाही बिटोरले.

श्री लक्ष्मी नारायण मन्दिर में सुप्रसिद्व मानस मर्मज्ञ जगतगुरु रामभद्राचार्य जी राकेश के मानपत्र देके सम्मानित कइले. साथही भोजपुरी सोसायटी सिंगापुर के अध्यक्ष सुग्रीमो मिश्र राकेश के एगो स्मृति चिन्ह प्रदान करत सम्मनित कइले.

राकेश श्रीवास्तव का टीम के सदस्य आर्गन वादक कन्हैया श्रीवास्तव, ढ़ोलक वादक विजय नाथ मिश्रा, तबला वादक उत्तम प्रसाद मिश्रा आ पैड वादक कमल श्रीवास्तवो के स्मृति चिन्ह देके सम्मानित कइल गइल.