ई खबर फिल्मी ना होके बिल्कुल असली ह. भोजपुरी सिनेमा में पिछला दिने बहुते धमाल का साथे आइल अभिनेत्री तुलिप सिंह, जिनकर असली नाम पूर्णिमा सिंह ह, के अहमदाबाद के पुलिस एगो ठगी का मामिला में खोजत बिया. पता लगावे पुलिस जब मुबई चहुँपल त ओकरा पता लागल कि मुंबईयो में तुलिप आपन कमाल कर देखवले बाड़ी. अनेसा बा कि नाहियो त दस करोड़ के ठगी कर के फरार हो गइल बाड़ी तुलिप सिंह.

तुलिप सिंह पर आरोप बा कि अपना साथी रमेश नैय्यर का साथे मिल के ऊ अहमदाबाद के ज्वेलर के के ज्वेलर्स किहाँ से करीबा अढ़ाई करोड़ के गहना ठग लिहले बाड़ी. पुलिस के अनेसा भइल कि हो सकेला कि ई गहना ऊ मुंबई लोखंडवाला के ज्वेलर संतोष ज्वेलर किहाँ बेच दिहले होखसु. बाकिर ओहिजा पता चलल कि उहो ज्वेलर तुलिप के ठगी के शिकार हो गइल बा. ओहिजा से ऊ चालीस लाख के गहना उधार ले गइली जवना के दाम आजु ले ना दिहली.

यूपी के रहे वाली पूर्णिमा सिंह अपना बच्चा के छोड़ के फिलिम मे कमाई करे मुंबई आ गइली आ ओकरा बाद फेरु कबो घर ओरि घूमिओ के ना तकली. पुलिस के सर्विलांसो से कवनो फायदा नइखे मिलत काहे कि तुलिप हर दस दिन पर आपन सिम कार्ड बदल लेत रहली. हालांकि साथी रमन नैय्यर के पुलिस पकड़ि लिहले बिया आ देर सबेर तुलिपो ओकरा फंदामें अइबे करीहें.

(समाचार मीडिया से)