पेशा से बिल्डर रहल रमेश पंचोरी आ फूलचन्द पंचोरी राजस्थान के व्यवसायी हऽ जेकरा बिहार का नामे से डर लागत रहे. भोजपुरीओ से कवनो नाता ना रहे बाकिर भोजपुरी फिल्मो बना डालल लोग आ बिहारो घूम लिहल. अब हाल ई बा कि कहत बा लोग कि साल में तीन चार बेर बिहार गइल पसन्द करी लोग काहे कि बिहार के सीधा सादा लोग आ संस्कृति एह लोग के रास आ गइल बा. एह लोग के बनावल भोजपुरी फिल्म “करंट मारे गोरिया” जल्दिये रिलीज होखे वाली बा. एह लोग के कहना बा कि फिल्म में पारिवारिक मनोरंजन बा आ साथ ही साथ कुछ सीखहू के मिली. मारुती क्रिएशन का बैनर में बनल एह फिल्म के निर्देशन टी बॉबी सिंह कइले बाड़न आ संगीत बिपिन बहार के हऽ. गीत प्यारेलाल यादव कवि आ फणीन्द्र राव के लिखल बा. फिल्म के मुख्य कलाकारन में विजय लाल यादव, बॉबी सिंह, अजय दीक्षित, उमेश सिंह, फूल सिंह, राजेश मोदी, उपासना सिंह, वर्षा तिवारी, महक मल्होत्रा, रीतू मेहरा, मल्लिका मल्होत्रा वगैरह शामिल बाड़े.

(स्रोत – संजय भूषण पटियाला)