अँ से शुरू होखे वाला भोजपुरी शब्द

(एहमें अपरिवर्तित तत्सम आ आगत शब्दन के शामिल नइखे कइल गइल। एक बेर एकरा के धेयान से देखीं आ अगर रउरा कुछ जोड़े भा घटावे जोग लउके त बता दीं जेहसे एकरा के सुधारल जा सके। शब्द-बिटोर का काम में सबसे बेसी संख्या में सकारे-जोग सुझाव देबे वालन के एह शब्द-बिटोर के छपला का बाद मुद्रित प्रति सादर भेंट कइल जाई।)

अनुस्वार आ चन्द्रबिन्दु के व्यवहार कई बेर भरमाह (भ्रम पैदा करे वाला) होला।

भोजपुरी लिखत घरी नाक से निकलत ध्वनि खातिर’ ँ’,’ ं’ आ ‘ङ’ तीनों रूप मिल सकेलें। इनकर काम एके नइखे, एहसे जरूरत भर इनकर भेद राखल उचित बा।
चंद्रबिंदु (ँ) मुख्य रूप से स्वर के नासिक उच्चारण बतावेला। जइसे— हँ, छाँव, गाँव।
अनुस्वार (ं) कई शब्दन में व्यंजन से पहिले आवे वाली नासिक ध्वनि बतावे खातिर लिखल जाला। जइसे— अंग, रंग, बंद।
भोजपुरी में ङ के प्रयोगो कुछ शब्दन में उपयोगी हो सकेला। खास कर जहाँ ओकरा से उच्चारण भा अर्थ के जरूरी भेद साफ होत होखे, ओहिजा ओकर प्रयोग के जगह बा। जइसे— मांग — माँगे से जुड़ल अर्थ.  माङ — सिर के बाल के बीच के रेखा। बाकिर हर जगह अनुस्वार के बदले ङ लिखल जरूरी नइखे। आंगन के आङन भा जंघिया के जङिया लिखे के आधार खाली उच्चारण के नकल ना होखे के चाहीं। जहाँ प्रचलित रूप सहज आ अर्थ में साफ बा, ओकरा के जबरदस्ती बदलल जरूरी नइखे।
एहसे सामान्य अनुशंसा रही—
स्वर के नासिकता खातिर चंद्रबिंदु, प्रचलित नासिक व्यंजन खातिर अनुस्वार आ जहाँ उच्चारण भा अर्थ के जरूरी भेद होखे उहवाँ ‘ङ’ के प्रयोग कइल जाव।
लक्ष्य हर नासिक ध्वनि के अलग चिह्न देवे के ना, जरूरी भेद के साफ राखे के बा।